Drejtori i Përgjithshëm i Hekurudhave të Republikës së Maqedonisë së Veriut Transport (HRMV) SHA-Shkup, Orhan Murtezani, priti në një takim njohës dhe të mirëseardhjes, tridhjetë e dy të punësuarit të cilët ditë më parë nënshkruan kontrata pune me kompaninë tonë. Ai u dëshiroi sukses në kryerjen e detyrave, dhe theksoi se punësimi i tyre vjen në një moment të rëndësishëm, kur kompania përballet me një deficit personeli, veçanërisht në lëmin e transportit hekurudhor.
Nga 32 të punësuarit, 22 janë shqiptarë, me çka konkursi i fundit, ka rritur ndjeshëm edhe përfaqësimin e shqiptarëve në këtë kompani. Sa për krahasim, në vitin 2018, numri i shqiptarëve të punësuar në HRMV ka qenë 11, ose 1.16, ndërsa aktualisht nga gjithësej 946 të punësuar, 82 janë shqiptarë, ose 8.6 për qind.
Makinistët, manevriestët, kondukterët dhe stafi tjetër profesional i punësuar së fundmi, do të kontribuojë drejtpërdrejt në përmirësimin e shërbimeve dhe në zhvillim më efikas të transportit hekurudhor, në mënyrë që të plotësojë nevojat e pasagjerëve dhe të klientëve.
